ໃນວັນທີ 28–30 ມິຖຸນາ 2021 ໄດ້ມີການຈັດກອງປະຊຸມກ່ຽວກັບ ຂໍ້ລິເລີ່ມໃໝ່ຂອງການເຈລະຈາໃນຂອບ ອົງການການຄ້າໂລກ (ອຄລ) “National Workshop on State of Play of WTO New Initiatives” ທີ່ກະຊວງອຸດສາຫະກຳ ແລະ ການຄ້າ, ພາຍໃຕ້ການເປັນປະທານກ່າວເປີດໂດຍ ທ່ານ ສັນຕິສຸກ ພູນສະຫວັດ, ຮອງຫົວໜ້າ ກົມນະໂຍບາຍການຄ້າຕ່າງປະເທດ, ກະຊວງອຸດສາຫະກຳ ແລະ ການຄ້າ ໂດຍມີຜູ້ເຂົ້າຮ່ວມຈາກພາກລັດ, ທຸລະກິດ ແລະ ບັນດາສະມາຄົມພາຍໃຕ້ສະພາການຄ້າ ແລະ ອຸດສາຫະກຳແຫ່ງຊາດລາວ ຈຳນວນ 50 ຄົນ. ກອງປະຊຸມໄດ້ຮັບການສະ ໜັບສະໜູນດ້ານວິຊາການຈາກກອງເລຂາ ອຄລ ແລະ ດ້ານງົບປະມານຈາກໂຄງການ ສ້າງສະພາບແວດລ້ອມທີ່ເອື້ອອໍານວຍຕໍ່ທຸລະກິດລາວ Laos Business Environment (LBE) ຂອງ USAID.
ຈຸດປະສົງຂອງກອງປະຊຸມ ແມ່ນເພື່ອສ້າງຄວາມຮູ້ ແລະ ຄວາມເຂົ້າໃຈກ່ຽວກັບຄວາມຄືບໜ້າຂອງການເຈລະຈາໃນປະຈຸບັນຂອງ ອຄລ ໂດຍສະເພາະຂໍ້ລິເລີ່ມໃໝ່ທີ່ຕິດພັນກັບ 1) ການອຳນວຍຄວາມສະດວກດ້ານການລົງທຶນເພື່ອການພັດທະນາ (Investment Facilitation for Development); 2) ລະບຽບການພາຍໃນທີ່ຕິດພັນກັບການບໍລິການ (Services Domestic Regulation); 3) ບັນຫາກ່ຽວກັບ ສານປົນເປື້ອນຂອງພຣາດຕິກ ແລະ ສະພາບແວດລ້ອມການຄ້າແບບຍືນຍົງ (Plastics Pollution and Environmentally Sustainable Plastic Trade) ; 4) ການຄ້າທາງເອເລັກໂທຣນິກ (E-Commerce); 5) ຂໍ້ລິເລີ່ມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (Micro, Small and Medium-Sized Enterprises); 6) ການປຶກສາຫາລືກ່ຽວກັບການປະຕິຮູບ ອຄລ ໂດຍມີເປົ້າໝາຍເພື່ອໃຫ້ລະບຽບການຂອງ ອຄລ ສອດຄ່ອງກັບສະພາບເສດຖະກິດໃນປະຈຸບັນ. ພ້ອມນີ້, ທັງເປັນການແລກປ່ຽນຄຳຄິດເຫັນໃນການກະກຽມກຳນົດຈຸດຢືນຂອງ ສປປ ລາວ ເພື່ອກະກຽມໃຫ້ກອງປະຊຸມລັດຖະມົນຕີອົງການການຄ້າໂລກ ຄັ້ງທີ 12 (Ministerial Conference – MC12) ທີ່ຈະມີຂຶ້ນໃນທ້າຍປີ 2021.
ເນື່ອງຈາກການເຈລະຈາຮອບພັດທະນາໂດຮາ ໃນຂອບ ອຄລ ໄດ້ສືບຕໍ່ແກ່ຍາວນັບແຕ່ປີ 2001 ມາເຖິງປະຈຸບັນ ແລະ ບໍ່ມີທ່າທີ ທີ່ຈະສະຫຼຸບການເຈລະຈາລົງໄດ້ ສາເຫດຍ້ອນຄວາມແຕກໂຕນທາງດ້ານລະດັບການພັດທະນາຂອງສະມາຊິກ ແລະ ຜົນປະໂຫຍດທີ່ແຕກຕ່າງກັນ ຈຶ່ງເຮັດໃຫ້ຫຼາຍບັນຫາທີ່ຍັງສືບຕໍ່ເຈລະຈານັ້ນ ບໍ່ສາມາດສະຫຼຸບໄດ້. ສະນັ້ນ, ປະເທດກຳລັງພັດທະນາ ຈຶ່ງໄດ້ສະເໜີບັນດາຂໍ້ລິເລີ່ມໃໝ່ ທີ່ເຫັນວ່າຄວນນຳມາເຈລະຈາໃນຂອບ ອຄລ ເພື່ອໃຫ້ສອດຄ່ອງກັບຄວາມຮຽກຮ້ອງຕ້ອງການຂອງສະພາບການຄ້າສາກົນໃນປະຈຸບັນ. ສຳລັບ ສປປ ລາວ ແມ່ນໄດ້ເຂົ້າຮ່ວມສະໜັບສະໜູນໃນ 3 ຫົວຂໍ້ລິເລີ່ມໃນການເຈລະຈາຄື: (1) ການຄ້າທາງເອເລັກໂຕຣນິກ; (2) ຈຸລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (MSMEs); ແລະ (3) ບັນຫາການອໍານວຍຄວາມສະດວກໃນການລົງທຶນ ຍ້ອນເຫັນວ່າ ຂໍ້ລິເລີ່ມເຫຼົ່ານີ້ ສາມາດນຳຜົນປະໂຫຍດມາສູ່ ສປປ ລາວ, ໂດຍສະເພາະແມ່ນຈະຊ່ວຍຮັບປະກັນການເອື້ອອໍານວຍຜົນປະໂຫຍດແກ່ການພັດທະນາການຄ້າທາງເອເລັກໂຕຣນິກ; ແກ້ໄຂບັນຫາການເຂົ້າເຖິງແຫຼ່ງທຶນຂອງຜູ້ປະກອບການ MSMEs, ຫຼຸດຜ່ອນອຸປະສັກຂອງການສົ່ງອອກ, ມາດຕະຖານສິນຄ້າ ແລະ ການເຂົ້າເຖິງຕະຫຼາດ; ແລະ ປັບປຸງດ້ານຄວາມໂປ່ງໃສຂອງການລົງທຶນ ໂດຍສະເພາະແມ່ນ ປັບປຸງຂັ້ນຕອນ ແລະ ເງື່ອນໄຂຕ່າງໆທີ່ກ່ຽວຂ້ອງກັບການລົງທຶນ ໃຫ້ມີຄວາມສະດວກວ່ອງໄວຂຶ້ນ, ສາມາດຄາດຄະເນໄດ້ ແລະ ເສີມຂະຫຍາຍການພັດທະນາທີ່ຕິດພັນກັບການລົງທຶນໃຫ້ດີຂຶ້້ນເທື່ອລະກ້າວ.
ນອກຈາກນີ້, ສປປ ລາວ ຈະໄດ້ສືບຕໍ່ເຂົ້າຮ່ວມການເຈລະຈາໃນບັນຫາຕ່າງໆ ທີ່ຕິດພັນກັບກຸ່ມປະເທດດ້ອຍພັດທະນາ (LDCs) ຢ່າງຕັ້ງໜ້າ ເພື່ອຍາດແຍ່ງເອົາຜົນປະໂຫຍດສູງສຸດຈາກລະບົບການຄ້າຫຼາຍຝ່າຍ ແລະ ກະກຽມຈຸດຢືນໃຫ້ແກ່ ສປປ ລາວ ໃນກອງປະຊຸມ MC12, ໂດຍສະເພາະແມ່ນ ຂໍ້ສະເໜີທີ່ຕິດພັນກັບ ການປະຕິບັດແບບພິເສດ ແລະ ແຕກຕ່າງຂອງປະເທດດ້ອຍພັດທະນາ ເພື່ອເຮັດໃຫ້ ສປປ ລາວ ສາມາດເຊື່ອມໂຍງກັບສາກົນໄດ້ຢ່າງມີປະສິດທິພາບ ແລະ ປະສິດທິຜົນ.
ກອງປະຊຸມດັ່ງກ່າວໄດ້ສິ້ນສຸດລົງໃນວັນທີ 30 ມິຖຸນາ 2021 ເວລາ 16:30 ໂມງ.
