ໃນຕອນເຊົ້າເວລາ 09:00 ໂມງ ຂອງ ວັນທີ 02 ກຸມພາ 2021 ໄດ້ມີການຈັດກອງປະຊຸມແລກປ່ຽນຄຳຄິດເຫັນ ເນື່ອງໃນໂອກາດການເຂົ້າເປັນສະມາຊິກອົງການການຄ້າໂລກ ຂອງ ສປປ ລາວ ຄົບຮອບ 8 ປີ ໃນຫົວຂໍ້: “ນະໂຍບາຍການຄ້າລາວ ໃນຍຸກເສດຖະກິດດິຈິຕອນ” ທີ່ກະຊວງອຸດສາຫະກຳ ແລະ ການຄ້າ, ພາຍໃຕ້ການເປັນປະທານຂອງ ທ່ານ ນ. ເຂັມມະນີ ພົນເສນາ, ລັດຖະມົນຕີກະຊວງອຸດສາຫະກຳ ແລະ ການຄ້າ ໂດຍມີຜູ້ເຂົ້າຮ່ວມຈາກພາກລັດ, ພາກທຸລະກິດ ແລະ ສະຖາບັນການສຶກສາ ຈຳນວນ 200 ຄົນ. ກອງປະຊຸມໄດ້ຮັບການສະໜັບສະໜູນດ້ານງົບປະມານຈາກໂຄງການ ສ້າງສະພາບແວດລ້ອມທີ່ເອື້ອອໍານວຍຕໍ່ທຸລະກິດລາວ Laos Business Environnent (LBE) ຂອງ USAID.
ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອເຜີຍແຜ່ກ່ຽວກັບການເຈລະຈາໃນປະຈຸບັນຂອງອົງການການຄ້າໂລກ (ອຄລ) ແລະ ແລກປ່ຽນຄຳຄິດເຫັນ ລະຫວ່າງພາກລັດ, ພາກທຸລະກິດ ພ້ອມທັງ
ສະຖາບັນການສຶກສາ ກ່ຽວກັບນະໂຍບາຍການຄ້າຂອງ ສປປ ລາວ ໃນຍຸກເສດຖະກິດດິຈິຕອນ ແລະ ການກະກຽມຄວາມພ້ອມໃນການຫຼຸດພົ້ນ
ອອກຈາກປະເທດດ້ອຍພັດທະນາ ທີ່ຕິດພັນກັບວຽກງານການຄ້າ. ຜົນຂອງການສົນທະນາຄັ້ງນີ້ ຈະນໍາໃຊ້ເປັນພື້ນຖານໃນການສ້າງຍຸດທະສາດນະໂຍບາຍການຄ້າສາກົນ ກໍຄືການເຊື່ອມໂຍງໃນອະນາຄົດ.
8 ປີ ຂອງການເປັນສະມາຊິກ ອຄລ, ສປປ ລາວ ໄດ້ສຸມເຫື່ອເທແຮງ ເຂົ້າໃນວຽກງານການຈັດຕັ້ງປະຕິບັດບັນດາພັນທະ ດ້ວຍການປັບປຸງນິຕິກຳຕ່າງໆ ໃຫ້ມີຄວາມສອດຄ່ອງ, ມີຄວາມໂປ່ງໃສ ແລະ ສ້າງສະພາບແວດລ້ອມທີ່ເອື້ອອຳນວຍຄວາມສະດວກໃນການດຳເນີນທຸລະກິດ ເພື່ອເຮັດໃຫ້ນັກລົງທຶນ ມີຄວາມເຊື່ອໝັ້ນຕໍ່ນະໂຍບາຍການຄ້າ ແລະ ການລົງທຶນຂອງ ສປປ ລາວ. ຄຽງຄູ່ກັບວຽກງານດັ່ງກ່າວ ການຫັນເອົານະໂຍບາຍການຄ້າ ໃຫ້ທັນກັບຍຸກເສດຖະກິດດິຈິຕອນ ແມ່ນມີຄວາມສໍາຄັນ ແລະ ຈໍາເປັນທີ່ສຸດ ຕໍ່ການພັດທະນາເສດຖະກິດ-ສັງຄົມ ໂດຍການນຳໃຊ້ເຕັກໂນໂລຊີການສື່ສານຂໍ້ມູນຂ່າວສານ ຫຼື ICT ເຂົ້າໃນຂະບວນການຂັບເຄື່ອນ ການຜະລິດ ແລະ ການດຳເນີນທຸລະກິດ ເພື່ອນໍາໄປສູ່ການສ້າງມູນຄ່າເພີ່ມໃຫ້ແກ່ສິນຄ້າ ແລະ ການບໍລິການ ລວມທັງການປະຕິຮູບພື້ນຖານການຜະລິດສິນຄ້າທີ່ເປັນໜໍ່ແໜງ ເພື່ອ ກ້າວໄປສູ່ອຸດສະຫະກຳ 4.0.
ສຳລັບ ສປປ ລາວ ການຍາດແຍ່ງເອົາຜົນປະໂຫຍດຈາກການເຊື່ອມໂຍງເສດຖະກິດກັບພາກພື້ນ ແລະ ສາກົນ ແມ່ນເຫັນໄດ້ຢ່າງຈະແຈ້ງຈາກການປະກອບສ່ວນຢ່າງຕັ້ງໜ້າເຂົົ້າ ໃນການເຈລະຈາບັນຫາໃໝ່ໃນ ອຄລ, ການເຂົ້າເປັນພາຄີຂອງສັນຍາ ASEAN Agreement on E-Commerce, ການກະກຽມເຂົົ້າຮ່ວມເປັນພາຄີຂອງ ສັນຍາວ່າດ້ວຍເຕັກໂນໂລຊີຂໍ້ມູນຂ່າວສານ (Information Technology Agreement: ITA) ແລະ ການສ້າງດໍາລັດວ່າດ້ວຍ ການຄ້າທາງເອເລັກໂຕຣນິກ ແມ່ນສະແດງໃຫ້ເຫັນເຖິງການກະກຽມຄວາມພ້ອມຂອງ ສປປ ລາວ ເພື່ອຫັນເອົານະໂຍບາຍການຄ້າ ໃຫ້ທັນກັບຍຸກເສດຖະກິດດິຈິຕອນ ແລະ ການກະກຽມຄວາມພ້ອມໃນການຫຼຸດພົ້ນອອກຈາກປະເທດດ້ອຍພັດທະນາ.
ກອງປະຊຸມດັ່ງກ່າວໄດ້ສິ້ນສຸດລົງໃນເວລາ 12:00 ໂມງ.
